Header Ads

本地同志桑拿:入門精讀


阿守相信好多朋友都好怕去同志桑拿,怕污糟、怕人多、怕淫亂,雖然~~有部份係事實,但識得玩既話,其實可以避重就輕,減輕至少八成危險。

事實上,香港的同志桑拿愈開愈多,基本上都已經成就同志性生活的一部份,阿守覺得點都要入去「試下、參觀下」,阿守平時都有去幫襯,都叫熟路,係度就分享一D經驗畀D新手朋友。


簡介同志桑拿格局

首先,同志桑拿照字面上解釋就係沖涼的地方,香港直場的桑拿仲有埋骨妹幫客人洗腳同按摩,當然仲有 Sex 啦!而香港同志桑拿一樣有沖涼地方,冇骨仔提供,卻有很多地方和房間,畀同志之間 Sex 咁囉!

一般同志桑拿的格局大致分 Reception、Locker 位、大廳、沖涼房、迷宮同埋黑房,以下會逐一介紹。

先選定一間想去的同志桑拿,按鐘入門,先去 Reception 畀入場費,各間同志桑拿價錢不一,而且每個時段又可能唔一樣,因此要問清楚。

然後 Reception 就會畀 Locker 鎖匙和毛巾你,前者就係去 Locker 位擺好隨身物品,後者就係畀你去沖涼抹身用。

請記得自己 Locker 幾多號,同埋鎖匙一定要跟身,最好就係戴住係手或者腳,始終同志桑拿內人多雜亂,「開心」時畀人順手牽羊都唔奇,再加上依家好多大陸人落香港,搵唔到地方住,就會直入同志桑拿「定居」,小心為妙。

再者,同志桑拿環境又黑,唔見了就很難搵。真係唔見左,搵 Reception 啦!咁你記得自己 Locker 幾多號就方便好多了。


沖涼房有如桑拿命脈

當去完 Locker 位除晒衫之後,放晒私人物品入去,鎖好,建議唔好帶D貴重野入同志桑拿,費時唔見,到時一定追究唔到。然後用條毛巾圍住下身(唔怕醜的話可以唔圍),再走去沖涼房沖身。

大家都唔想做愛時污污糟糟,成尋煙味汗味吧?

對於阿守來說,沖涼房於同志桑拿等同心臟般重要,客人進來會去沖涼,客人玩完之後又會去沖涼,沖涼房愈大,就愈能容納更多的客人,生意才能愈做愈大。

大部份沖涼房都會有濕蒸房同乾蒸房,前者有水份降溫,逗留時間能夠比較長,而且水蒸汽冷卻後在身上變成水珠,根本就是天然的潤滑劑,再加上燈光昏暗,因此好多人都會選擇係呢度「完事」。

後者溫度較高,亦較燈通明,焗身會較快「興」,加快血液循環,焗完出黎一身爽晒,不過唔好焗太耐,約 15-20 分鐘,太耐可能會流鼻血,甚至會暈呢!因此阿守真的不建議在乾蒸房搞。

另外,由於沖涼房到處都是水,所以玩到有咩污糟野出晒黎,隨時都可以沖走,因此玩乜都得!

此外,好多同志桑拿的沖涼房裝修得好有心思,體貼少少的會有0仔專用的洗肛水,厲害少少的仲有按摩池,任浸唔嬲。


坐大廳可以靜觀其變

Anyway,係沖涼房「淨身」之後,就可以圍返條毛巾走去大廳。有陣時,同志桑拿會搞D全裸日咁,入鄉就隨俗,唔好圍條毛巾入廳入房,唔係D人會「妙」你的!

一般同志桑拿的大廳劃地不會太細,以供大家暫時休息,有 Sofa 坐、睇電視、雜誌等,亦都可以食場內提供的食物和飲品,大部份都唔洗錢。

坐大廳有個優勢,就係可以先視察一下人潮,同時四處尋找目標,人多的可以慢慢揀,人少的可以慢慢等,另一方面,坐在大廳也等於會被其他人見到,如果被別人睇中,而自己又接受到的話,就可以直接入房開波,節省很多時間。


迷宮四圍摸營造氣氛

至於迷宮,就是很多同志桑拿營造氣氛的必備元素,通常迷宮都會設計得很暗,其黑暗的程度可以是當有人站在你手及的位置,你仍不能清楚看到他的樣子,而且多是九曲十三彎,通道亦較窄,大約只能容許兩個人通過,因此大家都需要慢慢地摸黑前進,手和身體都會不經意地碰到身邊的人,從而製造「機會」,此心理遊戲設計得真的非常厲害。

在迷宮裡,如果遇到「合適」的對象,建議大家先「試探」對方,可以行到佢身邊,慢慢用身體貼近佢,或者用手摸佢,如果見佢冇反應,又或者佢用手摸返你,即係佢代表都鍾意你,咁就已經成功一半。

阿守在此強烈勸告大家,如果該對象表現不耐煩,甚至用手撥開你,咁你就要立即急流引退了,太過份的話,搞到人地出聲鬧你就冇癮。

當「試探」完之後,就要去「了解」對方,至少要認清楚對方是不是自己想要的 Number,今時今日,高大威猛主動狂野唔代表係1仔,陰柔軟弱嬌聲嗲氣亦都唔代表係0仔,呢個世代真係有好多「妖1Man0」,最好就係直接開口問。

雖然阿守知道絕大部份都是10配,但都聽聞過有D朋友係撞正11配、或者00配,唔係話唔得,岩 Feel 就OK啦!只不過最後結果可能係互打飛機囉!

如果遇到一D傻傻地、行為怪異的,建議唔好埋身,因為佢地隨時「Take 左野」、「上晒車」,佢地可能自己做緊乜都控制唔到,更加唔知佢地會對你做乜,所以避一避啦!


入黑房前睇清環境

搵到 Partner 之後,就可以帶佢入迷宮內附設的房間,通稱為「黑房」,係就係黑媽媽,不過可以開燈的,怕醜的可以鎖門,唔洗畀出面的人睇免費四仔 Live。

入去前首先望一望地下,睇睇有冇污糟野,好似用舊了的紙巾、避孕套,又或者一塊塊乾了的精液,有就換房,大家玩都要玩得健康衛生。

入面會有「開波三寶」避孕套、潤滑劑、紙巾,仲有個垃圾桶,唔洗自備。

玩完之後,請有手尾一點,把用過的東西丟去垃圾桶,否則人人都整污糟晒D房,同志桑拿唔洗半小時就冇房用了。

如果需要在房入面的地上「典來典去」,阿守建議把自己的毛巾鋪在地上,始終都怕唔乾淨,例如會有D過期精、口水等等,玩完去沖涼時再問 Counter 拎多條毛巾咁囉!

開完波就可以去沖涼,沖完如果未夠皮可以繼續,「食飽」就可以去 Locker 位換衫執野走人。


補充:識人比較重要

如果開完波想 Keep Contact,不妨主動一點問人拎電話號碼,日後可以發展成 Boyfriend 又得,波友又得,就算只係普通朋友都冇問題。

大家都知道,同志在直人的社交生活真係好苦悶,識多D同志朋友,約埋一齊大家可以毫無顧忌講男人,不知幾開心!

阿守誠心建議大家,桑拿唔好太挑剔奄尖,搵食又好,發洩獸性又好,或者去見老朋友,純粹休息都好,總之千祈唔好入去揀老公老婆,你揀人,人地都揀緊你架,隨時食白果,無無聊聊就會企成晚,浪費時間!


沒有留言

So Gay HK. 技術提供:Blogger.